عملت حادث وعربيتي لا زالت محجوزة في القسم !
الحمد لله رب العالمين ربنا شاء اني اعمل حادث بالعربية يوم الخميس في تمام الساعة 1.30 ظهرا انا كنت راجع عن طريق الكورنيش متجه لشبرا الخيمة فلقيت ان الطريق واقف فدخلت يمين عشان اخدها من جوا من وسط مجمع مدارس داخل الطريق ماشي على 20 تقريبا عشان على الصفين العربيات واقفة صف اول وتاني فبالتالي الطريق رايح جاي فمش مستحمل اي سرعة اصلا ! من الجهة اليسرى عربية بوليس طالعة من احد المعاهد انا شفتها فوقفت عشان اديله المجال انه يدخل الطريق -يعني انا واقف- ظهرت فجأة عربية لانوس منطلقة بسرعة عالية جدا جاية في المقابل -في تقديري كانت 100 تقريبا- (الطريق ميستحملش سرعة اكتر من 40 اساسا ) اصطدم بالجانب الايمن بتاعه في عربية البوليس من قوة الصدمة اتنطر بالعربية في اتجاهي وقام داخل بالجانب الايسر بتاعه في الجانب الايسر عندي ! طبعا الاضرار زي مانتوا شايفين ! اللانوس:- http://nileup.com/up/uploads/nilemotors_13719459061.jpg http://nileup.com/up/uploads/nilemotors_13719459062.jpg اللانوس من الجهة اليسرى اللي خبطني بيها اكصدام وفانوس وتقريبا المقص اتكسر لأن العجلة الشمال مكسورة تحت العربية وفرقعت كمان اما من الجانب الايمن اللي خبط بيه عربية البوليس فاكصدام مكسور والفانوس مكسور من تحت والرفرف زي مانتوا شايفين عربيتي:-
اما سياراتي زوزو المحترمة فالرفرف والباب وكسر في شفة الاكصدام ممكن تتلحم عادي يعني
دا بيثبت ان الفيرنا قوية الحمد لله :]
وان اشاعة ان اللانوس قوية وصاجها قوي دي مقولة ليس لها أي اساس من الصحة مطلقا :]
المهم نزلنا وجبت اللي سايق العربية اللانوس وصوتنا علي وبتاع فخرج معاون المباحث فقلتله انا مش متحرك من هنا غير لما اعمل محضر ومش همشي غير لما اخد حقي ! فقالي حقك طبعا وقلنا رخصكم لو سمحتم
اديتله رخصتي ورخصة العربية فقال للتاني رخصك فقله حاضر هجيبها من العربية
اللي راح يجيبها من العربية قام جاري وهرب وساب العربية !
كدة فهمنا ان العربية دي مسروقة وانها مش عربيته !
أصريت اني اعمل محضر وبالفعل بعت القسم ونش رفع العربية اللانوس عشان مش بتتحرك اساسا وعربيتي واحد خدها وداها القسم هي ماشية عادي
اتحجزت عربيتي والعربية التانية ومضيت على المحضر !
طبعا سبب حجز عربيتي حاجتين ان الطرف التاني مش موجود اساسا فعشان يتعمل فحص فني ليها وتتقدر تكلفة التلفيات قد ايه بالضبط
الحاجة التانية ان رخصة العربية منتهية وخرجت من فترة السماح
لقيت مأمور القسم –حاجة كدة معلق نسر و3 نجوم- بيقلي انا هحجزك انت كمان !
قلتله نعم انا اتحجز ليه بقا ؟!
دانا المجني عليه وانا المتضرر !
قلي ايوة انت المجني عليه بس انت سايق برخصة مركبة منتهية ودي لوحدها جنحة جنائية !
قلتله بص حضرتك انا راجل دكتور مش هينفع اني اتحجز او ابات في الحجز دي خالص
شوف اي حل تاني غير دا
فنده على الأمين قله اعمله محضر وخليه يمشي وييجي بكرة علشان النيابة
خلصنا المحضر فعلا وخدت بطاقتي ومشيت
بعدها ب 4 ساعات لقيت الأمين اللي عملي محضر بيقلي العربية طلعت مسروقة وصاحبها جالنا وكان عاوز يبوس راسك عشان عربيته رجعت وكدة قلتله طيب خير الحمد لله رب العالمين
وعلى الساعة 1.30 بالليل لقيت حد بيتصل بيا بيقلي انا فلان الفلاني محامي المهندس فلان الفلاني
فقلتله ايوة اهلا وسهلا اؤمرني ؟!
قلي انا بكلم حضرتك بخصوص العربية اللانوس اللي خبطت حضرتك النهردة
العربية دي موجودة في قسم اول شبرا الخيمة !
قلتله دا حقيقي فعلا
قلي العربية دي اتسرقت من 3 ايام من النزهة الجديدة وعملنا محضر في قسم النزهة وحصلت مفاوضات مع اللي سرقوها وكانوا طالبين 30000 جنيه عشان يرجعوها
واحنا عاوزين نشكرك انك اصريت انك تعمل محضر وان العربية تتحجز وانك ممشيتش وبتاع وكدة
وانهم هيقابلوني بكرة في النيابة عشان اجراءات الافراج عن العربيتين
في الواقع انا كنت مضايق وحزين على عربيتي جدا
ولكن لما العربية دي رجعت لصاحبها انا فعلا مبسوط اني كنت سبب انها ترجع
اكيد اللي عند ربنا مبيروحش الحمد لله رب العالمين :]
يتبع بما حدث في النيابة :]
